Take a fresh look at your lifestyle.

2 ஆண்டுகளுக்கு பிறகு சபாரி பூங்கா பொதுமக்கள் பார்வையிட மீண்டும் திறப்பு

57

துபாய் மாநகராட்சி சார்பில் 100 கோடி திர்ஹாம் செலவில் அல் வர்கா 5 என்ற பகுதியில் உள்ள அல் அவீர் செல்லும் சாலையில் பிரமாண்டமான வன விலங்குகள் உலாவும் பகுதி அமைக்கப்பட்டது. மொத்தம் 119 எக்டேர் நிலப்பரப்பில் உருவாக்கப்பட்ட இந்த வன விலங்கு பகுதியானது சபாரி பூங்கா என பெயரிடப்பட்டது. இங்கு காட்டில் வாழும் விலங்குகள், பறவைகள் மற்றும் தண்ணீர் வாழ் உயிரினங்கள் என 3 ஆயிரம் வன விலங்குகள் இயற்கையான சூழலில் நடமாடி வருகிறது.

இந்த பூங்கா முதன் முதலில் பொதுமக்கள் பார்வையிடுவதற்காக கடந்த 2017-ம் ஆண்டு டிசம்பர் மாதம் 12-ந்தேதி திறக்கப்பட்டது. அதன் பிறகு அந்த பூங்கா பராமரிப்பு மற்றும் மறுசீரமைப்பு பணிகளுக்காக கடந்த 2018-ம் ஆண்டு மே மாதம் மூடப்பட்டது. தற்போது அனைத்து பணிகளும் நிறைவடைந்து புதுப்பொலிவுடன் பொதுமக்களுக்காக நேற்று மீண்டும் திறக்கப்பட்டது.

அப்போது சுற்றுலா பயணிகள், பார்வையாளர்களை வரவேற்கும் விதமாக ஆப்பிரிக்க நாட்டின் பழங்குடியினரின் நடன நிகழ்ச்சிகள் நுழைவுவாயிலில் நடந்தது. இதில் சிறப்பம்சம்சமாக அரேபியா, ஆப்பிரிக்கா, ஆசியா நாடுகளில் உள்ள கிராமங்களின் மாதிரிகள் மிக தத்ரூபமாக சிறந்த உள்கட்டமைப்புகளுடன் உருவாக்கப்பட்டுள்ளது. இந்த வளாகத்தை சுற்றி பார்க்க ரெயில் வண்டி உள்ளது. இந்த ரெயிலில் குடும்பத்துடன் வன விலங்குகளின் நடமாட்டத்தை கண்டு ரசிக்கலாம்.

மேலும் கண்ணாடி தடுப்புகள் அமைக்கப்பட்டு அதிலும் ஹெனா எனப்படும் கழுதை புலி, புலி போன்ற விலங்குகளை கண்டு ரசிக்கலாம். இந்த பூங்காவில் சிங்கம், வெள்ளை சிங்கம், புலி, ஒட்டகச்சிவிங்கி, வரிக்குதிரை, பாம்புகள், முதலை, ஆமை, ஓநாய்கள், நெருப்புக்கோழி, நீர்யானை, காண்டாமிருகம், சிம்பன்சி, குரங்குகள் உள்பட பல்வேறு விலங்குகள் காட்சிக்கு வைக்கப்பட்டுள்ளது. அந்தந்த விலங்குகளுக்கு ஏற்ப தண்ணீர் நிலைகள், பாறைகள், குகைகள் என அனைத்து வசிக்கும் இடங்களும் மிக இயற்கையாக அமைக்கப்பட்டுள்ளது.

இந்த பூங்காவை பார்வையிட பெரியவர்களுக்கு 50 திர்ஹாமும், சிறியவர்களுக்கு 20 திர்ஹாமும் நுழைவு கட்டணம் நிர்ணயம் செய்யப்பட்டுள்ளது. பூங்கா முழுவதும் சபாரி பயணம் செய்ய பெரியவர்களுக்கு 85 திர்ஹாமும், சிறியவர்களுக்கு 30 திர்ஹாமும் கட்டணமாக நிர்ணயம் செய்யப்பட்டுள்ளது. வாகனம் மற்றும் உதவியாளர்கள் உதவியுடன் சபாரி பயணம் செல்லலாம். இதில் 3 வயதுக்குட்பட்ட குழந்தைகள், மாற்றுத்திறனாளிகள் மற்றும் 60 வயதுக்கு மேற்பட்ட முதியவர்களுக்கு (2 உதவியாளர்கள் உள்பட) அனுமதி இலவசமாகும்.

இலவச அனுமதி பெற அடையாள அட்டை அல்லது ஆவணங்களை கொண்டு செல்ல வேண்டும். இந்த பூங்காவை காலை 9 மணியில் இருந்து மாலை 5 மணி வரை பொதுமக்கள் பார்வையிடலாம். http://www.dubaisafari.ae/ என்ற இணையதளம் மூலமாக, மாநகராட்சியின் ‘செயலி’யில் பதிவு செய்தும் பெற்றுக்கொள்ள ஏற்பாடு செய்யப்பட்டுள்ளது.

மேற்கண்ட தகவல் துபாய் மாநகராட்சி வெளியிட்ட செய்திக் குறிப்பில் கூறப்பட்டுள்ளது.